Литература урокĕсем шкул ачисен пĕлĕвне тарăнлатма, тавра курăмне анлăлатма, хайлавсенчи ĕç-пуçа пурнăçри пулăмсемпе танлаштарма, ырăпа усала уйăрма пулăшаççĕ.  Тăван литература урокĕсенче пирĕн шкулти вĕрентекенсем çыравçăсен пурнăçĕпе тата пултарулăхĕпе ачасене паллаштарнă чух чылай чухне чăн пурнăçри çынсем, пулăмсем çинчен каласа параççĕ, пĕр-пĕр тема витĕмлĕрех, кăсăклăрах, уçăмлăрах пултăр тесе тăрăшаççĕ.

     Нумаях пулмасть 8-мĕш класс ачисем вăрçă вăхăтĕнчи тата ун хыççăнхи чăваш литературине пăхса тухрĕç: Илпек Микулайĕн «Госпитальте» калавне тата Валентин Урташăн «Пурăнас килет» поэмине вĕренчĕç. Çак хайлавсенче Тăван çĕр-шывăн Аслă вăрçинче паттăрлăхпа палăрнă Сергей Михайлов лейтенантпа Валя салтак çинчен çырса панă.

     Ачасем  çынлăх туйăмĕпе, чунĕпе пуян, хастар чĕреллĕ, ырă сăнарсенчен тĕслĕх илеççĕ. Пирĕн шкулта Совет Союзĕн Геройĕ Илья Григорьевич Мешаков ĕçленĕ.  Вăл вăрçăра, Кăнтăр Буг юхан шывĕ хĕрринче пынă çапăçура паттăрлăх кăтартнă: 6 фашиста пĕтернĕ, иккĕшне тыткăна илнĕ, çапла майпа вырăс çарĕ нимĕçсене каялла хăваласа кайма пултарнă. Паттăр салтаксем вăрçă çинчен çырнă хайлавсенче кăна мар,  хамăр тăрăхрах, хамăр шкултах пулнă тесе вĕрентрĕ паян Димитриева А.Г. саккăрмĕш классене илемлĕ сăмахлăха пурнăçпа çыхăнтарса. Ачасем ятарласа хатĕрленĕ презентаци тăрăх  Мешаков И.Г. çинчен кăсăкланса итлерĕç, çуралнă шухăш-туйăмĕсем пирки каласа пачĕç. Вĕсен шучĕпе, шкулта кашни класра паттăрлăх урокĕсем ирттермелле.