Нарăсăн 18-мĕшĕнче чăваш чĕлхипе литературине вĕрентекенсен  «Уçă урок-2016» республика фестивалĕ иртрĕ. Фестивале чăваш шкулĕнчен 36 учитель, вырăс шкулĕнчен 17 учитель хутшăнчĕ.

      Муркаш районĕнчен фестивале 4 вĕрентекен хутшăнма кăмăл тунă. Фестивале салам сăмахĕ каласа вĕренÿ институчĕн проректорĕ А.Р. Федорова уçнă. Вăл вĕрентекенсене чăваш чĕлхи пуласлăхĕшĕн яваплăх туйса тата хастартарах ĕçлеме хавхалантарнă. Икĕ кун хушшинче уявра учительсем тухса калаçнă,  хăйсен ăсталăхĕпе паллаштарнă. Итлекенсем ĕçтешĕсен урокĕсене сÿтсе явнă.

      Уявра Чăваш наци конгресĕн ĕç тăвакан комитет председателĕн çумĕ Г.Л. Никифоров Конгресс Президенчĕн Н.Ф. Угасловăн Пĕтĕм тĕнчери тăван чĕлхе кунĕпе каланă саламне вуласа панă, Ярапайкассинчи вăтам шкулта вĕрентекен Димитриева Алевтина Геннадьевнăна Чăваш наци конгресĕн Тав хучĕпе чысланă. Чăваш чĕлхипе литературине вĕрентекенсен «Уçă урок» тăваттăмĕш республика фестивалĕн çĕнтерÿçисем йышĕнче А.Г. Николаев ячĕллĕ Калайкассинчи вăтам шкулти Степанов Александр Марсович (2 вырăн) тата Шатракассинчи тĕп шкулти Вишнева Ольга Александровна (3 вырăн) пулчĕç. Пултаруллă вĕрентекенсене саламлатпăр, тухăçлă ĕçлеме сунатпăр.