Кăçалхи ака уйăхĕн 2–мĕшĕнче Ярапайкассинчи вăтам шкулта Совет Союзĕн Геройĕ И.Г.Мешаков ячĕпе ăмăрту вăтăр улттăмĕш хут иртрĕ. Пысăк пĕлтерĕшлĕ спорт мероприятине сумлă хăнасем килсе уява пухăннисене ăшшăн саламларĕç. Муркаш район администрацийĕн пуçлăхĕ Р.Н.Тимофеев хăй сăмахĕнче Совет Союзĕн Геройĕ И.Г.Мешаков ячĕпе ирттерекен соревновани районти чи сумлă ăмăртусенчен пĕри пулнине, ăна кашни çул пĕрре те сиктермесĕр паянхи куна çитиччен ирттерни çак мероприятин хакне татах та ÿстернине палăртрĕ. Муркаш районĕн ентешлĕх ертÿçи А.И. Федотов пухăннисене паттăрсем манăçманнине каларĕ: «Илья Григорьевич Мешаков пек паттăрсене яланах асра тытмалла, вĕсемпе мухтанмалла, мĕншĕн тесен вĕсем пире çакăн пек мирлĕ пурнăç туса панă, чураран хăтарнă, çавăншăн савăнмалла. Эпир халь таса та сывă çĕр-шывра пурăнатпар. Илья Григорьевич автоматчик, 20 çулхи салтак, хăй паттăрлăхне вăрçă хирĕнче, Одесса тăрахĕнче кăтартнă, Совет Союзĕн Геройĕ ята илме тивĕç пулнă. Çак ăмăртăва пăрахăçламалла мар, темле йывăр пулсан та шкул дирекципе ял администрацийĕн малашне те йĕркелесе ирттермелле».  Ярапайкасси ял администрацийĕн пуçлăхĕ Г.Л.Алексеев соревнование хутшăнакансене ăнăçлă ĕçлеме сунчĕ. Ярапайкассинчи вăтам шкул директорĕ А.А.Скворцова уяв хăнисене савăк кăмăлпа кĕтсе илнине палăртрĕ. Ăмăртăва Ярапайкасси, Чуманкасси, Çатракасси, «Передовик», «Оринино» тата «Ударник» командисем хутшăнчĕç. Спорт соревнованине хутшăнакансем волейбол, шахмат выляса, пăшалтан тата кире пуканĕ персе, канат туртса пĕр-пĕринпе ăмăртрĕç. Кубока çĕнсе илекенни тата 1-мĕш вырăн тухаканни «Оринино» команди                   пулчĕ, 2-мĕшпе 3-мĕш вырăнсене ярапайсемпе чуманкассисем пайларĕç. Шахматла вылякан П.П.Пушкарева, кире пуканĕ перекен А.В.Налимова, пăшалтан перекен А.Р.Угольникова çитекен пулмарĕ. Ăмăрту çĕнтерÿçисене Муркаш районĕн волейбол федерацийĕн ертÿçи А.П.Давыдов саламларĕ. Соревнование ирттерме пулăшнă А.И.Федотова, И.П.Терентьевăна, Л.М.Яковлева, О.И.Бибукова, М.М.Максимова, А.Г.Сорокина чунтан тав тăватпăр.