Ярапайкассинчи вăтам шкулта Чăваш чĕлхи эрнинче тĕрлĕ мероприятисем иртрĕç.
Ĕç çынни çулталăкне халалланă «Юратнă ĕçĕм» тĕл пулу Чăваш чĕлхи эрнине уçрĕ. Ярапайкасси ял тăрăхĕнчи пултаруллă ал ăстисемпе ирттернĕ тĕл пулура ал ăстисен ĕçĕсенчен тунă выставка та ĕçлерĕ. Итакачкасси ялĕнчи Смирнова Л.И. тата Скворцова С.А. хăйсен чун киленĕçĕ пирки 5-8 класра вĕренекенсене каласа пачĕç. Пултаруллă хĕр арăмсем – чăн-чăн алă ăстисем. Вĕсем хĕресле те, бисерпа та тĕрлеççĕ, крючокпа сĕтел çи, тутăр çыхаççĕ, бисерпа пăралукран илемлĕ чечек пуххисем ăсталаççĕ. Пушă вăхăт тупăнсанах юратнă ĕç патне туртăнать вĕсен алли. Шкул ачисем вашават хăнасем ал ĕçĕпе çемйипех ĕçленине пĕлчĕç. Арçынсем те, ар çын ачасем те ютшăнмаççĕ иккен çак ĕçрен. Лариса Ильиничнăпа Светлана Александровна хăйсен эрешĕсемпе тĕрлĕ выставкăсене тата уявсене те илемлетеççĕ. Тĕрлĕ картинăсене туянакансем те пуррине каларĕç вĕсем. Паянхи уявра Смирнова Л.И, Скворцова С.А. тата Ярапайкасси ялĕнчи Максимова Н.И. ĕçĕсенчен хатĕрленĕ выставкăна ачасем хаваспах пахаларĕç, вĕсен маттурлăхĕнчен тĕлĕнчĕç, хăнасене кăсăклă ыйтусем пачĕç. 5-мĕш класс ачисем хăнасене технологи урокне килсе мастер-класс пама ыйтрĕç, тепĕр урока Лариса Ильинична хаваспах килме кăмăл турĕ, ачасене бисертан чечек пуххи тума вĕрентме пулчĕ. Тĕл пулăва технологи предметне вĕрентекен Силова С.А. тата чăваш чĕлхипе литератури вĕрентекенĕ Димитриева А.Г. йĕркелерĕç, 7 класри Ангелина Жукова тата Виктория Лоцманова чăвашла ертсе пычĕç. Светлана Александровна выставкăпа паллашнă май ачасене тĕрĕ техникине ăнлантарса пычĕ, технологи предметĕнчи «алмазная вышивка» ăнлава уçăмлатрĕ. Алевтина Геннадьевна шкул администрацийĕ ячĕпе кăмăллă ал ăстисене тĕл пулăва хапăл тусах хутшăннăшăн тав турĕ, çак уяв шкул ачисене илеме курма-туйма, ал ĕçĕ патне туртăнма, пултарулăха аталантарма май панине, ăнтăлу кÿнине палăртрĕ.
«Чăваш кино историйĕ» калаçăва Раççей кино çулталăкне халалланă. Çавна май 5, 7 класс ачисем чăваш кино историне туллин тишкерчĕç. Презентаци пăхнăçемĕн чăваш кино историйĕ пуян, чăваш киноне пуçарса яракан çын – И.Я.Яковлевпа пĕр ялта çуралнă, Чĕмпĕрти чăваш шкулĕнче вĕреннĕ И.С.Максимов-Кошкинский, пĕрремĕш чăваш актриси – Тани Юн пулнине, пĕрремĕш чăваш фильмĕсен ячĕсене пĕлчĕç, кино кадрĕсемпе паллашрĕç. «Тăван чĕлхе, эс – вĕçĕмсĕр тĕнче!» тата «Асамлăх тĕнчинче» ăмăртусенче чăваш халăх историйĕпе, културипе, сăмахлахĕпе çыхăннă ыйтусене 5 класс ачисем хаваспах хуравларĕç. «Çĕнтерÿçĕсем» ушкăн «Ăслă ачасем» ушкăнран маттуртарах пулни курăнчĕ. «Çыравçăсен çĕр-шывĕнче» литература вăййи тăван сăмахлăх ăстисен ячĕсемпе çыхăннă. 7 класс ачисем чăваш çыравçисен тата вĕсен хайлавĕсен ячĕсене тишкерчĕç: икĕ хушаматлă çыравçăсене, çыравçăсен хушма ячĕсене, хĕрарăм çыравçăсене т.ыт.те шырарĕç; тĕс, чĕр чун, ăру-тăванлăх сăмахĕсемпе çыхăннă хайлав ячĕсене тупрĕç, хăйне евĕр тĕпчев турĕç.
Чăваш чĕлхипе литератури вĕрентекен Димитриева А.Г. 7-8 класс ачисемпе «Муркаш районĕн çыравçисем» темăпа урок ирттерчĕ. Шкул ачисем проект мелĕпе ирттернĕ урока тĕплĕ хатĕрленсе килни палăрчĕ. Пултаруллă çыравçăсен (С.М.Михайлов-Янтуш, Ю.И.Скворцов, А.Н.Лазарева, К.И.Пайраш, И.Г.Григорьев, Кăтра Мишши, А.Т.Петтокки, В.Т.Ржанов) пурнăçĕпе пултарулăхне туллин уçса пачĕç, презентацисене ăнлантарса пычĕç, кăсăклă фактсене пĕлтерчĕç. Ярапайкасси ял тăрăхĕнчи виçĕ çыравçă (Александра Лазарева, Куçма Пайраш, Иван Григорьев) хайлавĕсен тематики, сăнарсен прототипĕсем, пурнăç ÿкерчĕкĕсем сăнланни пирки анлăрах тишкерчĕç. Урокра çĕнĕ вĕренÿ технологисен мелĕсене ачасем тухăçлă усă курчĕç, вĕсемшĕн фишбоун, хĕвеллĕ кластер, синквейн, Блум чечекĕ тăвасси йывăр мар. Хăйне евĕр урок ачасен пĕлĕвне тарăнлатма, тавра курăмне анлăлатма, мухтавлă ентешĕмĕрсемпе мăнаçланма май парать.
Шкул ачисем «Пĕтĕм чăваш диктанчĕ-2016» акцие те активлă хутшăнчĕç. Ака уйăхĕн 25-мĕшĕнче диктант çырчĕç. 7 класри Ангелина Жуковăпа Виктория Лоцманова районти Чăваш чĕлхи кунне халалланă уявра палăрчĕç. Жукова А. Чăваш наци конгресĕн Муркаш районĕнчи уйрăмĕ ирттернĕ «Эп-чăваш» сочиненисен конкурсĕн призерĕ, Лоцманова В. чăваш наци культурин «Туслăх хĕлхемĕ» районти фестивалĕн призерĕ пулса тăчĕç.
Тăван чĕлхе, тăван сăмах пулсассăн
Эп пĕччен мар нихçан та тĕнчере.
Манпа çĕр тус пуплет ялан хавассăн
Эп вĕсене тытатăп чĕрере.