Чăваш халăх культуринче паллă йĕр хăварнă паллă çыравçă, ăста композитор Федор Павлович Павлов çуралнăранпа авăн уйăхĕн 25-мĕшĕнче 125 çул çитрĕ. Çак юбилея халалласа Ярапайкассинчи вăтам шкулта «Федор Павлов – тĕрлĕ енлĕ пултаруллă чăваш ывăлĕ» ятпа уяв каçĕ иртрĕ. Чăваш кĕпи тăхăннă 5 класс ачисем Ф. Павлов юррисемпе вăййа тухрĕç, юрă шăрантарчĕç (ертÿçи – Емельянова Г.Г.). Ташă ушкăнне çÿрекенсем (ертÿçи – Лоцманова М.А.) чăваш ташшипе савăнтарчĕç. Федор Павлович Павловăн чăвашла тата вырăсла сăввисене 6 тата 9 класс ачисем илемлĕ вуларĕç (ертÿçи – Димитриева А.Г.). Уява пухăннисем «Пирĕн урам анаталла», «Вĕлле хурчĕ – ылтăн хурт» юрăсене итлесе киленчĕç, «Ялта» драма  сыпăкне курчĕç, «Çĕнĕ сăмахсем туп» вăййа хутшăнчĕç. «Шăхлич» тата «Сăрнай» сăмахсенчен çĕнĕ сăмахсем туса пĕрремĕш ушкăн çĕнтерчĕ. Уява ертсе пыракансем – Мария Иванова тата Анастасия Алексеева - Ф.П.Павлов пурнăçĕпе пултарулăхне презентаципе усă курса туллин тишкерчĕç. Уява пĕтĕмлетсе Федор Павлов тĕрлĕ енлĕ талант пулнине палăртрĕç. Вăл - поэт, юрăç, драматург, композитор, прозаик, публицист, юрист, педагог, дирижер.