Ака уйăхĕн 29-мĕшĕнче Муркаш районĕнчи А.Г.Николаев ячĕллĕ Калайкассинчи вăтам шкулта иртнĕ «Чăваш ачи чăвашах» республика шайĕнчи 3-мĕш фестивале Ярапайкассинчи вăтам шкул вĕренекенĕсемпе вĕрентекенĕсем те хастар хутшăнчĕç. Фестивале чăваш тумĕ тăхăннă шкул ачисемпе вĕрентекенсем кар тăрса вăйă картипе пуçларĕç. Сумлă хăнасенчен Чăваш Республикин вĕренӳ институчĕн ректорĕ Ю.Н. Исаев пурне те саламларĕ, ăмăртусенче ăнăçусем сунчĕ.
Фестивале хутшăнакансем виçĕ секцире ĕçлерĕç.
«Вĕрентетпĕр чăвашла» ăмăртура чăваш чĕлхи предметне вĕрентмен учительсем хутшăнчĕç, чăвашла уроксем кăтартрĕç. Пирĕн шкултан çак ăмăртура, «Пурнăç урокĕ» номинацире математика вĕрентекен А.Ю. Албутова палăрчĕ.
«Савăнатăп эп чăваш пулнишĕн» ăмăртăва кĕçĕн класс ачисем хутшăнчĕç. Кунта 1-4 классенче вĕренекен ачасем чăваш халăхĕн пĕр-пĕр йăлине кăтартса пачĕç. Хамăр шкулти 3 класс ачисем (Хĕлхем» ушкăн) «Йăла управçисем» номинацире çĕнтерчĕç (ертÿçисем – М.А. Александрова тата Г.Г. Емельянова).
«Сар каччăпа сарă хĕр» ăмăртура 7-9 классенче вĕренекен яш-кĕрĕм чăваш халăх историне, культурине, чĕлхине, йăли-йĕркине пĕлнине кăтартрĕ. Шкул чысне 7 класри Анастасия Беловăпа Александр Плюхин ăнăçлă хÿтĕлерĕç, «Çамрăк чĕлхеçĕсем» номинаци çĕнтерÿçисем пулчĕç (ертÿçи – А.Г. Димитриева).
Чăваш чĕлхипе литератури вĕрентекен А.Г. Димитриевăпа Г.Г. Емельянова «Шкул ачисен патриотизм туйăмне мĕнлерех аталантармалла?» çавра сĕтелте тухса калаçрĕç.
Ăмăртусем хыççăн шкул ачисем чăвашла çăмăллăнах калаçакан А.С. Федеринчик украинецпа, Чăваш Республикин вĕренӳ институчĕн регион аталанăвĕ центрĕн ĕçтешĕпе, тĕл пулу ирттерчĕç. Унтан Никита Тĕнче велопутешественникăн интереслĕ калаçăвне тăнларĕç.
Çĕнтерÿçĕсене ăшшăн саламлатпăр, çитĕнÿсем сунатпăр!!!