Паян, раштавăн 19-мěшěнче, Муркаш муниципаллă округ администрацийěн çуртěнче чăваш чěлхипе литератури вěрентекенсен методика пěрлешěвěн семинарě иртрě. Семинар теми: «Çеçпěл Мишши пурнăçěпе пултарулăхне шкулта вěрентмелли çул-йěр». Чӳкěн 16-мěшěнче кăвар чěреллě поэтăмăр 125 çул тултарнине паллă турăмăр. Сăвăç Канаш районěнчи Çеçпěл (Касаккаси Шěкěр) ялěнче çуралнă. Кěркуннехи каникул вăхăтěнче Муркаш вěрентекенěсем çак яла çитсе курчěç. Кунти Çеçпěл Мишши ячěллě музейра поэт пурнăçěн саманчěсене туллин тишкерчěç , вăл çуралнă çурт вырăнне пырса пуç тайрěç. Юратнă сăвăç пирěн асран нихăçан та тухмě. Çак шухăш семинарта та тěпре пулчě. Пирěн шкул вěрентекенěсем те хастар пулчěç семинарта. Мероприятие йěркелекен А.Г. Димитриева вěрентекен Çеçпěл Мишши пултарулăхне культурăсен çыхăнăвě урлă вěрентмелли мелсем пирки каласа пачě. Г.Г.Емельянова шкул театрěсем валли çырса хатěрленě инсценировкăпа паллаштарчě.